ಸಲಹೆ

ಕಾಮನಬಿಲ್ಲನು ಕಾಣದ ಕಣ್ಣಿಗೆ
ಕಾಣುವುದೊಂದೆ ಬಣ್ಣ
ಬಿಳಿಯೊಳು ಅಡಗಿದೆ ವರ್ಣ ಅನಂತವು
ನಂಬುವೆಯಾ ನೀ ನನ್ನ?
ಕಣ್ಣು ಕಂಡರೂ ಏನೂ ಕಾಣದು,
ಜೀವಕಂಟಿದ ಯಂತ್ರ
ಹುಡುಕದೇ ನೀನು, ಕಾಣುವುದೇನು?
ಅರಸಲು ಅರಸು ಸ್ವತಂತ್ರ

ತಿನ್ನದ ಮಾವಿನ ಹಣ್ಣಿನ ರುಚಿಯ
ಓದಿ ತಿಳಿದಾನೆ ಜಾಣ?
ಹುಳಿಯೊಂದಿಷ್ಟು, ಸಿಹಿಯೊಂದಿಷ್ಟು,
ತಲೆಬುಡವರಿಯದ ಜ್ಞಾನ  
ಯಾರದೋ ಮಾತು, ಅರಿವಿಗೆ ದಕ್ಕದು.
ತೇಲಿಬರುವ ದನಿ ಕ್ಷೀಣ
ಎವೆಯಿಕ್ಕದ ಮನ ಹೊರಓಡದ ದಿನ,
ಮನತುಂಬುವುದೀ ಗಾನ

ತರ್ಕ-ವಿತರ್ಕದ ಆಚೆ-ಈಚೆಯಲಿ
ಬರೆದಿಹ ಚಿತ್ರ ವಿಚಿತ್ರ
ಕಾಲೂ ಕಾಣದು, ತಲೆಯೂ ತೋರದು,
ಅರ್ಥವಾಗದೀ ಸೂತ್ರ
ಅರ್ಥದ ಸ್ವಾರ್ಥದ ಮಾತಂತಿರಲಿ
ಇದು ಪರಮಾರ್ಥದ ಚಿತ್ರ
ಬರೆದವನಾರೋ? ಅಳಿಸುವ ಮುನ್ನ
ಮನತುಂಬಿಸಿಕೋ ಮಿತ್ರ